CEBU, Philippines - Milampos ang super bantamweight prospect nga si Dodie Boy Peñalosa Jr. pagkulit sa iyang ikaupat nga daog pinaagi sa knockout batok ni Roel Bacquiano sa first round sa ilang sangka sa main event sa “Dugong Kampiyon” boxing card sa miaging gabii diha sa Cebu City Sports Institute sa Brgy.Pasil, ning syudad.
Ang anak ni former two-division world champion Dodie Boy Peñalosa Sr. ug pag-umangkon ni WBO bantamweight titlist Gerry Peñalosa, wa maglangan pagdispatsar sa pambato sa Mimi Ricarte stable.
Tataw kaayo nga way dag-anan si Bacquiano sa kusug ni Peñalosa nga mitapos sa away gamit ang iyang makabungog nga left straight nga maoy mipahagsa sa Butuan City boxer sa 1:33 sa opening round.
Sa supporting bout, si Romnick Magos sa RWS stable mipaundang ni Anthony Sabalde sa SGG stable sa 2:23 sa fifth round.
Nakaipsot pinaagi sa split decision sila si Sonny Katiandagho sa Rommel Banquirigo batok nila ni Ryan Maano ug Sherwin Caday, samtang si Nick Bacalso midaog pinaagi sa unanimous decision batok ni Erwin Yamo.
Miresulta sa draw ang sangka tali nila ni Joe Marie Yuson ug Roldan Bereso. (BANAT NEWS)