Ernest Jay nag-una karon sa FYA caging

CEBU, Philippines - Gilubong sa bag-ong team Ernest Jay ang kontrang Viking Haulers, 72-54 aron magsolo sa liderato sa 3rd F. Llamas Youth Association (FYA) basketball tournament didto sa sitio Manggahan open court sa barangay Punta Princesa, ning siyudad.

Sa laing duwa, gilubong sab sa Orillaville ang OMKI Megavolts, 70-59 aron makigtabla sa ilang biktima sa managsama nilang 1-1 nga baraha.

Si Mclean Alcueno miposa og 18 puntos alang sa 2-0 nga Ernest Jay nga gipanag-iya ni ex-USJR Baby Jaguars Ernesto 'Baeng' Medalle Jr. Si Junrey Arreglo mitali sab og double figures sa iyang 10 puntos.

Ang Viking nga nakigtabla karon sa walay daog-daog nga   defending champion Simpolang Barbecue Haus sa ilang 0-2 nga baraha, gipangulohan nilang Paul Basalo ug Shaun Cal, kinsa miburak og 14 ug 10 puntos matag usa.

Sa laing bahin, ang ex-UC Webmasters nga si Daniel Enriquez, kinsa miposa og 17 puntos maoy nangu sa Orillaville, gisundan ni Ryan Tampus nga adunay 13 puntos.

Ang team owner sa OMKI nga si Robert Rabi mao sab ang nangu pinaagi sa iyang 15 puntos.

Puntos Matag Usa

Unang duwa:

Ernest Jay (72) - Alcueno 18, Arreglo 10, Labrador 9, Medalle 7, Martillan 7, E. Sabalande 5, Monisit 4, Sabalande 4, Del Mar 4, Avila 4

Viking (54) - Basalo 14, Cal 10, Baldago 7, Jaz 6, Canceko 4, Trinidad 3, Lañojan 2, Medalle 2, Pacaña 2

Ikaduhang duwa:

Orillaville (70) - Enriquez 17, Tampus 13, Cajucso 12, Evangelista 11, Tabada 9, Jabonero 6

OMKI (59) - Rabi 15, Abella 12, Orbita 11, Reubal 8, Jakosalem6, Martinez 5,Labrador 2, Palo 2, Codilla 1. – BANAT NEWS