CEBU, Philippines - Ang Rollway Customs Brokerage ni team manager Rolly de la Pieza nagsalig sa ilang mainitong rally sa final half ug mipukan sa 3MRJ, 68-65 sa nagpadayong LLBA Rollway Cup basketball tournament didto sa Villas Magallanes gym sa Lapu-Lapu City.
Nakatilaw og kastigo ang Rollway dihang gilubong sila sa 3MRJ og katunga paghuman sa first quarter, 12-24, apan nakabangon kini sa second half pinaagi sa ilang rally aron pahakan ang taga-liog nga labaw, 51-55 sa wala pa nila angkona ang makutas nga kadaugan.
Ang Rollway nga adunay walo ka daog sa napu ka duwa gipangulohan ni Uriel Manilag sa iyang 17 puntos, si Dondon Sevilla mitira og 12 puntos, samtang si Alvin Bentazal miigo og 10 puntos.
Nangu sa 3MRJ ni Renato Casinillo mao si Dindo dela Rama, kinsa miburak og 18 puntos. Sila si Pompey Ngujo ug Rey Lugo miamot og 10 puntos matag usa.
Sa main game, ang Igot Trucking ni team owner Junar Igot mihakot na sab og daog human nila gipilde ang Cavs ni team owner Dr. Michael Ouano.
Si Jonathan Tojeno nimaneho og 25 puntos aron pangulohan ang Igot Trucking, gisundan ni Edgardo Lungay nga adunay 20 puntos. Sila si Lito Magat ug Ricky Wagwag nagkumboya og 32 puntos.
Samtang ang naparot nga Cavs gipangulohan ni Jimboy Igot nga mibugha og 34 puntos. (BANATSPORTS)