CEBU, Philippines - Gisubhan og daog ang Sugbuanong tennis player nga si Israel 'RJ' Abarquez sa 1st DRB Men's Tennis Open kagahapon didto sa Alta Vista Golf and Country Club.
Ang second-ranked nga si Abarquez nasurpresa human makalingkawas gikan sa makutas nga kadaugan batok sa mas lig-on nga si Joseph Sierra, 10-8.
Sa laing bahin, ang title favorite nga si Francis Largo wala kaayo makasugat og problema tungod kay yano ra kaayo nga gipilde si Jim Cabaluna, 20-2.
Sa laing duwa, si Jayvee Canoy miagi og kalisud sa iyang pakigsangka batok ni Roy Tabotabo, 10-9 (7-4).
Si Kennex Abadia sa University of San Jose-Recoletos miposte sab og daog batok ni Jade Labaya, 10-1.
Ang lain pang nidaog kagahapon mao sila si Amiel Aya-ay batok ni Edwin Bacarisas, 10-4, Christian Tiongco batok Jicjic Bohol, 10-6 ug Junjun Tabura batok James Dumoran, 10-3.
Makalingaw nga duwa padayon karong adlawa sa mao gihapon nga binyu.
Ang torneyo molungtad hangtod sa Enero 29. Ang crossover semis ug finals adto na duwaon sa Pardo Tennis Club.
Magsilbe kining tune-up match alang sa National Collegiate Games sa Manila sunod bulan ug sa Palarong Pambansa karong summer. (BANAT NEWS)