CEBU, Philippines - Nagpabiling walay pilde ang Mandaue ug Talisay belles sa ikaupat nga adlaw nga aksiyon sa quarterfinal round sa 6th Governor Gwen Garcia Unity Volleyball (GUV) Cup kagahapon didto sa Cebu International Convention Center (CICC) sa Mandaue City.
Ang Mandaue mikulit sa ikatulo nilang sunod-sunod nga daog gikan sa mga kamot sa Tabuelan, 25-9, 25-11 sa pagpangulo nilang Genie Sabas, Jusabelle Brillo, Danika Yolanda Gendrauli, Rachel Singson ug Kennette Garces.
Ang Catmon nga maoy municipal cluster champion sa miaging tuig, nakabangon gikan sa ilang kapildihan dihang ilang gipahimungtan ang Minglanilla, 25-19, 25-16, samtang ang Liloan nakalingkawas batok sa Alcoy sud sa tulo ka sets, 23-25, 25-19, 25-14.
Sa men's division, ang Talisay spikers pabilin sab nga walay pilde human nila mabiktima ang Moalboal, 25-13, 25-9 kortesiya nilang RP team member Rhovel Verayo ug Kennith Bensig uban nilang Norvie Labuga, Kevin Casia, Ronald Moreno ug Ronald Acojedo. – BANAT NEWS