CEBU, Philippines - Napulo ka kulbahinam nga mixed martial arts action ang makita sa gikahinaman nga Universal Reality Combat Championship (URCC) Cebu VI nga gikatakda karong Enero 14 diha sa Cebu International Convention Center (CICC) sa Mandaue City.
Tulo ka titulo ang giandam sa maong pisikal nga away nga naglakip sa bantamweight, featherweight ug welterweight divisions.
Si Cary Bullos sa Self-Defense MAA mosuway og langkat sa korona sa bantamweight batok ni Leonard Delarmino sa Capanay MMA.
Ang pambato sa Sugbu nga si George Fansbaun sa Cebu MMA moharong ni Jimmy Yabo sa Self-Defense MMA sa featherweight division.
Sa welterweight category, si Tom Woodfin sa Deftac Cebu makigbinukbukay ni Rocardo Sapno sa Beefit Pythons Pit.
Ang kalihukan sanctioned sa Asian Mixed Martial Arts Federation ug sa Games and Amusement Board.
Gipaluyohan sab kini sa Colt 45, uban sa Solar Sports isip official media partner.
Alang sa mga tiket ug dugang mga detalye, mahimong motawag or log on sa www.urccmma.com. – BANAT NEWS