CEBU, Philippines - Laing sayon nga kadaugan ang nasakmit ni Mary Grace Delos Santos sa 10k women’s division, samtang milampos usab si Philip Duenas sa pag-angkon sa men’s class sa St.Theresa’s College Batch’ 87 - Glamour Run kagahapon didto sa The Terraces sa Ayala Center Cebu.
Sama sa gihapon, si Delos Santos maoy unang milabang sa finishline, gisundan sa batan-ong si Mary Joy Tabal, samtang ang beteranang si Christy Sevilleno-Tutor maoy third placer.
Sa men’s class, gipakita ni Duenas nga aduna usab siya'y katakus nga magmadaugon sa 10k class batok sa laing duha ka elite runners nga sila si Joebert Carolino ug Adonis Singson kinsa mipahiluna sa ikaduha ug ikatulong dapit.
Sa iyang bahin, si Joel Delposo milabni sa titulo sa 5k division batok nila ni Ian Bernido ug Jonas Tan kinsa migawas nga second ug third placer.
Sila si Jonalyn Gementiza, Rejeeli Sumaya ug Melody Romero mao usab ang top three finisher sa women’s division.
Ganting salapi ug medalya ang nadawat sa mga mananaug. Ang tipik sa salapi nga natigom sa maong lumba ihatag usab ngadto sa Antonio De Oviedo Center Cebu, usa ka foundation alang sa mga kababayen-an nga biktima sa pagpangabuso. (BANATSPORTS)