Cebu Niños kampiyon sa TOP

CEBU, Philippines - Mikulit og laing kasaysayan ang M. Lhuillier Kwarta Padala Niños human gipilde ang Misamir Oriental (MisOr) Meteors, 78-76 aron maangkon ang labing unang korona sa Tournament of the Philippines (TOP) sa tinaktakay nga Game-5 diha sa nagsugwak nga Cebu Coliseum kagabii.

Naglisud hinuon ang Niños tungod kay nakigsinukliay man og puntos ang Meteors sa maong duwa nga gihulagway nga labing pisikal nga duwa sa serye nga miresulta og pipila ka "unsportsmanlike" fouls.

Human sa ilang "come-from-behind" win sa Game-4 didto sa balwarte sa Meteors diin ilang gitabla ang serye 2-2, nakuha sa Niños ang momentum ug ila dayon kining gilubong og 10 puntos sa first period, 27-17.

Naputos usab sa turnovers ang MisOr nga naghatag og fastbreak points sa Cebu Niños. Gawas pa niini, naglisud usab ang MisOr pagpasulod sa ilang mga free throws nga mao unta ang mokitkit sa labaw.

Nahitabo ang   lamok-lamok sa oras nga 4:56 dihang gitawgan og unsportsmanlike foul ang point guard sa Niños nga si Mark Ababon, kinsa mipahagsa ni Robert Daa.

Imbes nga maluya misamot hinuon kaagresibo ang Niños ug gikan didto ilang gibalik ang labaw ngadto sa otso puntos human sa tres ni Stephen Padilla, 64-52, sa katapusang 1:24 sa third period.

Desidido nga mailog ang daog gikan sa Niños, ang Meteors mihimo og rally sa pagpangulo nila ni Reed Juntilla ug Eder Saldua aron pahakan ang labaw ngadto sa singko puntos 63-68 sa nahabiling 5:03 sa duwa.

Ang kanhi UV Green Lancers nga si Mark Ababon, daling mibawos pinaagi sa iyang lay-up ug kalit sab kining nanginit diin mibuhi og duha ka crucial triples aron mosikit sa iskor,   77-76 sa katapusang 14.2 sa duwa pabor sa Niños.

Ang point guard sa Niños nga si Froilan Baguion mipasulod og usa niya ka free throw alang sa dos puntos nilang labaw, 78-76.

 Aduna pa untay kahigayonan ang MisOr nga ihatod   ang duwa ngadto overtime, apan wala molampos si Cabahug sa pagpasulod sa iyang lay-up atubangan sa hugot nga depensa sa Niños.

Si Marlon Basco maoy nangulo sa Niños sa iyang 15 puntos, samtang ang gibayaw nga MVP sa liga nga si Stephen Padilla mitira og 12 puntos. Ang pilderong MisOr gipangulohan ni Cabahug sa iyang 20 puntos.