Cebu batok MisOr

CEBU, Philippines - Maglayog na sab ang magkaribal nga M. Lhuillier Kwarta Padala-Cebu Niños ug Misamis Oriental Meteors sa Game-1 sa ilang "best-of-five" finals series sa Tournament of the Philippines (TOP) karong alas-6 sa gabii diha sa Cebu Coliseum.

Ang Niños ug Meteors tulo ka tuig na nga nagkaribal sukad pa niadtong panahon sa Mindanao Visayas Basketball Association (MVBA)

 Tungod niini, segurado nga puno sa aksiyon ang makita karon sa mga Cebuano fans sa finals sa Liga Pilipinas-PBL merge league.

“Mahimo gyud ning usa ka classic finals series, kahibalo ta nga usa ka lig-on nga koponan ang MisOr ug segurado nga usa hatagan gyud mi nila og lisud nga duwa,” matud pa ni M. Lhuillier legendary coach Raul ‘Yayoy’ D. Alcoseba.

Bisan pa’g nakakuha og homecourt advantage, ang Niños of team owner Michel J. Lhuillier dili gihapon mokompiyansa tungod kay sinati na kaayo ang Meteors nga moduwa sa tugkaran sa Niños.

Ang Meteors mao ang bugtong koponan nga nakabuntog sa Niños, 54-52 nga nakapakurat sa mga Cebuana fans aron paglangkat sa Smart-Liga Pilipinas Conference 2 national championship niadtong Abril 20, 2009 diha sa Cebu Coliseum.

May sagol usab nga personal nga kalagot ang mga magduduwa sa duha ka koponan human sa nahitabong lamok-lamok atol sa MisOr leg sa TOP niadtong Hulyo 29 didto sa Xavier University gym, nga miresulta sa pagka-angol sa forward sa Niños nga si Nat Cruz.

Ang Niños, kinsa laraw’ng mokulit og kasaysayan isip unang kampiyon sa TOP magsalig gihapon nilang Bruce Dacia, Stephen Padilla, Marlon Basco, Ariel Mepaña, Abby Santos ug point guard Froilan Baguion. Hinuon, andam usab mosuporta ang bench players sama nila ni Ian Saladaga, Nat Cruz, Mark Magsumbol, Hafer Mondragon, Warren Ybañez ug Frank Nailon.

Sa ilang bahin, ang Meteors laraw nga mohimo og upset sa pagpangulo nila ni Neil Rañeses, Ronald Lamocha, Eder Saluda, Khiel Misa, Mark Andaya, Ramil Tagupa, Mark Moreno, Reed Friar Juntillas, Ronald Capati ug Ronald Reguerra.

Ang Ninos maoy mo-host sa unang duha ka duwa, sa dili pa kini motapon didto sa Cagayan de Oro sa Game-3 karong Biyernes ug Game-4 sa Sabado.

Kun kinahanglan, ang Game-5 mobalik dinhi sa Sugbu karong Septiyembre 14. (BANAT)