CEBU, Philippines - Gawas sa ilang personal nga interes, laing responsibilidad nga pas-anon sa mga Pinoy boxers mao nga modaog alang sa dungog sa nasud batok sa langyaw nilang mga kaatbang sa "Philippines vs. the World" fight card karong Sabado sa gabii diha sa Waterfront Cebu City Hotel and Casino.
Subling masaksihan sa tibuok kalibotan ang higpit nga panagribal sa Philippines ug Mexico sa sangka nila ni ALA knockout artist Rey 'Boom Boom' Bautista ug sa Mehikanong si Alejandro 'Zorrito' Barrera sa main event.
Bisan og moaway siya sa teritoryo ni Bautista, nag-awas ang kompiyansa ni Barrera nga modaog sa bisan unsa nga paagi aron usab mabarugan ang una niyang pangangkon nga mas maayo ang mga Mehikanong boksidor itandi sa mga Pinoy.
"I’m going to box. If the opportunity for a knockout presents itself, then I’ll take it," matud pa ni Alejandro, ang ig-agaw ni Mexican boxing legend Marco Antonio Barrera.
Si Bautista miangkon nga tinuoray nga warrior ang Mehikano, apan nakita niya nga mas mopatigbabaw siya sa ilang away tungod usab sa grabeng training nga iyang giagian inubanan sa inspirasyon nga ibalik ang iyang pangalan isip usa sa mga Pinoy world title contender.
Gibanatan usab ni Bautista ang iyang mga kritiko, kinsa kanunay nga mikuwestiyon sa iyang abilidad nga mobalik sa boksing human mopahuway og taas nga panahon tungod sa injury.
“Akoa lang, manan-aw lang sila kay karong Sabado na nako ipakita kanila ang tanan.” matud ni Bautista.
Sa laing bahin, ang reigning WBC Youth Intercontinental flyweight king nga si Milan Melindo namulso na daan nga modaog batok ni OPBF ranked No. 4 flyweight Jin-Man Jeon sa Korea.
Mopakita usab og aksiyon ibabaw sa ring si ex-OPBF super bantamweight ug WBO AsPac super featherweight titlist Jimrex Jaca, kinsa makigsinumbagay ni kanhi WBC Latino super featherweight champion Pepito Cuevas Jr.
Samtang si kanhi IBF minimumweight king Florante Condes moladlad sa iyang abilidad sa pakigsangka niya batok ni Sofyan Effendi sa Indonesia. – BANAT NEWS