CEBU, Philippines - Sa labing unang higayon dinhi sa Sugbu, ipahigayon ang Honda One Make Night Race karong Hulyo 24 diha sa Kartzone sa Panagdait sa brgy. Mabolo, ning siyudad.
Mga dekalibreng racers gikan sa Cebu ug Davao ang mosalmot sa lumba diin ilang ilogan ang "Visayas Rider of the Year" award.
Ang mga pambato sa Sugbu sama ni Keken Cabahug sa Cyrus Racing/Honda Motorworld, 2009 Cebu Rider of the year Lyndon Requilme ug Moises Muñoz sa TMAC Racing/Honda Motorworld, Bobby Mencias sa MBR/Honda Motorworld ug 2010 Honda One Make Race Mindanao Rider of the Year Vingie Coloma, 2009 Davao Rider of the Year Ernie Daguio Jr. sa Daguio Racing Team ug Motor-R Republic racers sama ni Chirss Karlou Samoga ug Niño Cabatingan sa Rico Laboratory ang mopakita sa ilang katakus sa katapusang leg sa 2009-2010 Honda One Make Race Underbone Circuit Racing VisMin series.
Ang Underbone circuit racing o road racing, usa sa labing malambuong motorsports dinhi sa nasud karon.
Ang usa ka adlaw nga lumba adunay lima ka race classes -- 100-110 super stock beginners, 100-110 novice open, 4-AT open (all-Honda Beat), 125 super stock beginners ug 125 novice open.
May gipuno sab nga duha ka kategoriya nga mao ang team race ug first timers. (BANAT NEWS)