CEBU, Philippines - Manglupad ang mga kinumo diha sa siyudad sa Lapu-Lapu sa boxing card nga ulohan og “Pasalamat sa Diretso 3” ugma sa gabii diha sa Lapu-Lapu City Auditorium.
Sa main event, si Marco Singwangcha sa Iligan City makigbinukbukay batok ni Isidro Balabat sa Bohol sa ilang 10-round duel sa super flyweight division.
Sa supporting main event, si Jestoni Singwangcha sa Masbate makigsangka batok sa Sugbuanong si Aljon Salugaol sa junior featherweight class.
Lakip usab sa moaway sa maong boxing card mao si Rex 'Tito' Singwangcha batok Marjun Baliguat sa Aklan, Tamagata Inso sa TI Cebu Gym batok RJ Ano-os sa Liloan ug Renjie Abenda sa Cagayan de Oro batok Erwin Pulvera sa Mandaue City
Si JP Bautista Singwangcha sa Manila makigharong usab ni Jerpol Valero sa Mandaue City, samtang si Lionel Legada sa Manila makigsinukliay og kumo batok ni Edmar Tuñacao.
Ang maong boxing card gipasiugdahan sa WAN (Wakee, Aljoe, Naris) Promotions uban sa suporta ni Lapu-Lapu City congressman-elect Arturo 'Boy' Radaza. – BANAT NEWS