CEBU, Philippines - Bugtong si Sally Mae Siso ang milansang og duha ka daog aron mangulo sa panon sa mga mananaog pagtapos sa 3rd Mayor Jonas Cortes Junior Tennis Club kagahapon didto sa Mandaue City tennis courts.
Giharian ni Siso ang girls' 16 ug 18 class bawion ang kapildihan sa iyang igsuong si Niño Siso, kinsa miundang atol sa semifinal round tungod sa trangkaso.
Si Sally Mae miugbok ni Crissiane Issa Kintanar, 10-1 aron pagdaog sa girls' 16 crown ug dayon iyang gipilde si Hannah Espinosa, 10-5 alang sa girls' 18-under title.
Si Kintanar, kinsa giayog makmak ni Sally Mae sa girls' 18-under sa finals, nakabawi pinaagi sa pagdemolis ni Thea Desiree Ceniza, 10-1 aron maghari sa girls' 14 division. Si Zethley Mae Alferez misakmit sa girls' 12 title human gipilde si Shyne Villareal, 10-6, samtang ang titulo sa unisex 10-under division napunta ngadto ni Arthur Craig Pantino human mikulit og 10-7 nga kadaugan batok ni Gener Francis Lambayan.
Sa laing bahin, si Israel 'RJ' Abarquez pabiling mipahiluna sa kinatas-ang dapit human miposte'g 10-4 nga kadaugan batok ni Amiel Aya-ay sa boys' 18-under category.
Si Fritz Satera maoy misakmit sa titulo sa boys' 16-under division human niya gibuntog si Dan Eldred Cinco, 10-5, samtang si Ralph Juliane mao ang naghari sa boys' 14-under pinaagi sa pagmasaker ni Wesmark Basanal, 10-2.
Nakatilaw na gyud og korona si Jan Godfrey Seno human nidaog sa boys' 12 division batok ni Arthur Craig Pantino, 10-3. – BANAT NEWS