"I Run for Earth, I Support Cortes 2010" run gitakda

CEBU, Philippines - Laing lumba sa dagan ang mahitabo sa dakbayan sa Mandaue ugma, Abril 22 sa alas-6 sa buntag.

Nagdala sa tema nga "I Run for Earth, I Support Cortes 2010," ang lumba nga anha manukad ug tapuson sa Mandaue City Cultural and Sports Complex adunay upat ka kategoriya -- 10K open, 5K, 3K ug 1K Fun Run.

"In line with the celebration of Earth Day, we would like to express our concern for environment considering that it is banner of Mayor Cortes," matud ni event organizer Jovin Eusebio nga nahinabi sa Banat News.

Ang makampiyon sa 10K men ug women's divisions makadawat og P4,000, ang second placer makaangkon og P3,000 ug ang third placer mobulsa'g P2,000.

Ang top three finishers sa 5K gantihan og P3,000, P2,000 ug P1,500 matag usa. Ang top three finishers sa 3K makaangkon og P2,000, P1,500 ug P1,000 matag usa.

Ang 1K makadawat og consolation prizes.

Gawas nga libre ang registration, may libre sab nga t-shirt ang ipanghatag ngadto sa mga partisipante, gawas lang sa 1K Fun Run.

Hinuon, giawhag ang 1K fun runners sa pagsul-ot og yellow t-shirts.

Ang lumba nga gipahaom sa kasaulogan sa "Earth Day" karong Abril 22, gitukod sa mga higala ug tigpaluyo ni Jonas Cortes uban sa pakigtambayayong sa kagamhanan sa dakbayan sa Mandaue.   (BANATNEWS)