CEBU, Philippines - Naghaguros nga mga suntok ang gibuhian ni Christian Bacolod aron sa pagpahunong ni Benjie Manatad sa round 3 sa Summit Natural Drinking Water Amateur Boxing Series didto sa Gaisano Countrymall carpark sa Banilad, ning siyudad.
Ang nag-inusarang boksidor gikan sa Mabolo National High School mipakita sa iyang kabangis ug midabodabo ni Manatad nga maoy nakaaghat sa referee nga hunungon ang duwa ubos sa 42-kilograms division.
Sa laing bahin, midaog usab si Reoxyl Tabogon sa Mandaue batok ni Dan Lou Codilla sa Pit-os pinaagi sa puntos. Human sa tulo ka rounds nga binukbukay, tulo ka hurado ang mi-iskor og 2-1 pabor ni Tabogon.
Mikulit sab og daog sila si Elmer Puno sa Flores Boxing Club (FBC) ug Rheyan Canillas sa Toledo batok sa tagsa-tagsa nila ka kaatbang. Si Puno mipukan ni Jodel Talle sa ilang sangka sa 51 kgs.division, samtang si Canillas mimakmak ni Robert Labanza sa 57 kgs. category.
Gawas ni Puno, laing FBC boxers mikulit og daog naglakip nila ni Gerry Soreño (20 kgs.), Ariel Sibay (26 kgs) ug Mark Kevin Soreño (45 kgs.). (BANATNEWS)