CEBU, Philippines - Duha sa lima ka titulo ang nalangkat ni Keken Cabahug sa ikaduhang hut-ong sa Honda Motorworld Underbone Circuit Racing didto sa Kartzone sa Panagdait sa Brgy. Mabolo, ning siyudad.
Bugtong si Cabahug sa Cyrus Racing ang mihakot og duha ka titulo pinaagi sa 125 novice open ug 100-110 super stock beginners class.
Ang kauban ni Cabahug nga si Gary Caneda mipahiluna sa ikaduha nga dapit sa 125 novice open, gisundan ni Lyndon Requilme sa TMAC-Motorworld.
Sa 100-110 superstock, si Cabahug mipuhal sa iyang teammate Jes Louie Vega alang sa taas nga dapit, samtang si Mark Capoy sa Skut Garage/Motorworld Racing nalandig sa ikatulo.
Nakadala sab hinuon sila si Capoy, Requilme ug Caneda og titulo human nanghawod sa laing mga dibisyon.
Si Capoy naghari sa beginners 125 superstock, samtang ang sunod nga duha ka luna giangkon nilang Vega Stephen Lauron sa Cyrus Racing.
Wala kapugngi si Requilme sa 4-AT all-Honda Beat class. Si Caneda miangkon sa ikaduha nga dapit, samtang si Gilbert Miro sa Skut Garage/Motorworld Racing napunta sa ikatulo.
Si Caneda misakmit sa championship trophy pinaagi sa 100-110 novice open. Iyang gipilde si Peter Gjengaar sa Motorworld Racing ug Bobby Mencias nga mi-okupar sa ikaduha ug ikatulo nga dapit. (BANATNEWS)