CEBU, Philippines - Garbo sa Sugbu nga si Shaneen Sia mikabkab og tulo ka bulawang medalya sa Carlos Palanca Jr. (CPJ) National Taekwondo Championships niadtong weekend didto sa Rizal Memorial Sports Complex sa Vito Cruz, Manila.
Napuhalan sa 16-anyos nga Sia ang laing 23 ka contenders lukop nasud aron dominaron ang individual poomsae under sa juniors division.
Nakakuha sab siya og laing bulawan sa pair ug team events.
Sa laing bahin, ang playing coach nga si Glenn Lava, mikabkab lang og silver sa individual poomsae seniors category.
Ang ikatulong Sugbuanong entrante nga si Iyan Lim napunta sa ikalima nga dapit sa individual poomsae boys division.
Dul-an unta sa 20 ka magduduwa ang kuwalipikado alang sa nationals, apan tulo lang ang nakahimo tungod kay ang uban didto mokumbati sa Central Visayas Regional Athletic Association (CVIRAA) Meet nga gisugdan niadtong Lunes didto sa dakbayan sa Danao. – BANAT NEWS