Bakbakan na sa Sinulog!

CEBU, Philippines - Iladlad na sa ALA Boys -- Milan 'Melinyo' Melindo ug AJ 'Bazooka' Banal ang tinagoan nilang abilidad batok sa mga langyaw'ng boksidor sa "Bakbakan sa Sinulog!" karong alas-7 sa gabii diha sa Pacific Grand Ballroom sa Waterfront-Cebu City Hotel and Casino sa Brgy. Lahug, ning siyudad.

Si Melindo (19-0, 5KOs) nagtinguha nga mosakmit sa ikatulo niyang regional belt sa tulo ka managlahing dibisyon batok ni WBC Intercontinental Youth flyweight champion Anthony 'Baby Assassin' Villareal (9-2, 4KOs) sa Estados Unidos. Samtang ang garbo sa Brgy. Ermita nga si Banal (20-1, 16KOs) maninguha sab nga modaog sa away batok sa beteranong si Cecilio 'Boga' Santos (24-11-3, 14KOs) sa Mexico aron subling makaangkon og kahigayonan nga moaway alang sa world title.

Sa gipahigayong weigh-in kagahapon diha sa The Event Center sa SM City-Cebu, sila si Melindo ug Villareal pulos mitimbang og 109 lbs.

Ang lumad nga taga-Cagayan de Oro nga si Melindo mibahad nga dili niya paabton sa ikalimang round si Villareal kay iya kining tumbahon sa sayong bahin sa away.

Sa iyang bahin, ang ALA strategist ug trainer nga si Edmund Villamor nagkanayon nga dili kakompiyansaan ang Mehikanong si Santos, apan masaligon nga modaog ang mas kusgan ug paspas nga si Banal.

Sa supporting bouts, mobanat usab ang duha ka ALA prospects nga sila si James Bacon ug Larry 'Bonjovi' Canillas batok sa mga bisitang Thai boxers. Si Bacon (13-1, 8 KOs) makigbinukbukay ni Thittichon Singwancha (12-3, 2KOs), samtang si Canillas (11-1, 11KOs) mosukod sa abilidad ni Pet Twin Gym (8-3-1, 6KOs).

Mokompleto sa undercard bouts mao sila si Jojo Intor sa Negros Occidental batok ni Romnick Hoyvia sa Bohol ug Jonel Gadapan sa Cagayan De Oro kontra Jayson Inso sa Mandaue City.

Mopakita usab og aksiyon ang mga national amateur boxers nga sila si Adonis Cabalquinto batok ni Jimmy Vallares ug Karina Jane Recaido batok ni Irish

Magno.

Ang mga tiket nagkantidad og P1,500 alang sa VIP first row, P1,250 alang sa VIP second row, P1,000 sa VIP third row, P500 sa ringside, P300 sa ballroom ug P250 alang sa balcony. – BANAT NEWS