ANS nag-una sa secondary level

CEBU, Philippines - Ang Abellana National School (ANS) maoy bugtong tunghaan nga mipakita og maayong labok alang sa Unit 9, dihang gisakmit nila ang solong liderato sa secondary division sa 19th Cebu City Olympics niadtong miaging adlaw diha sa Cebu City Sports Center.

Ang ANS nagtangag karon og 64 puntos, human gisakmit sa ilang baseball team ug sepak takraw ang gold medals batok sa Unit 1 ug Unit 3. Nikolekta usab og 14 ang ilang mga gymnast nga maoy nakahatag og dakung labaw sa ANS batok sa ilang mga kaatbang.

Nagsunod sa ANS mao ang Unit 3 nga mi-okupar sa ikaduhang dapit bitbit ang 25 puntos, samtang ang Unit 1 maoy kasamtangang mipahiluna sa ikatulong dapit.

Hinuon, posible pang malabwan sa Unit 8 ang Unit 3 ug kun mogawas na ang resulta sa swimming event nga gidominaran sa Unit 8 ubos sa pagpangulo ni record-holder Loren Dale Echavez, kinsa mikolekta og lima ka gold medals sa girl's division ug Jebb Cane, kinsa milangkat usab og laing upat ka bulawan sa boy’s division.

Sa laing bahin, ang Unit 4 maoy nag-una karon sa elementary level, gisundan sa Unit 1 ug Unit 5. Ang Unit 4 mikolekta og 28 puntos, diin 15 puntos niini gikan sa baseball, 10 sa sipa ug tres puntos gikan sa gymnastics.

Ang Unit 1 ug Unit 5 nagtabla sa ikaduhang dapit sa managsamang 27 puntos, samtang ang Unit 2 mikabkab og 15 puntos alang sa ikatulong dapit.

Gipapas ni Anthony Linn Navarro sa Unit 7 ang record ni Lester Ang nga 1:20.70, human niya gitapos ang 100-meter backstroke sa oras nga 1:19.13. Si Navarro mihakot og upat ka gold ug usa ka silver medals.   (BANATNEWS)