Surban hari sa 2nd Red Durano Mountainbike Championships

CEBU, Philippines - Gisakiyo ni Niño Surban ang kampiyonato sa 2nd Congressman Red Durano Mountainbike Championships didto sa Danao City niadtong miaging adlaw.

Wala kapugngi sa mga kaatbang ang kakusog ni Surban, kinsa mitapos sa lumba sud sa 32 minutos ug 45.32 segundos.

Mitapos sa ikaduha si Jan Phil Rodriguez nga mi-oras og 37:44.715, gisundan ni Jezam Baldomar sa oras nga 39:06.59.

Sa seniors division, si Gino Basirgo maoy nanghawod human niya gipukan ang higpit niyang karibal nga si Elmer Navarro. Si Basirgo mitapos sa lumba sa oras nga 37:19.20, samtang si Navarro mirehistro og oras nga 38:11.70.

Sa iyang bahin, si Ben Fabroa maoy naghari sa masters A class sa iyang oras nga 40:42.683, samtang si Sanny Boy Catubay mao usab ang kampiyon sa master B class (28:40.57).

Gidominar sab ni Roman Suplig ang executive class sa oras nga 29:49.59, gisundan nilang Toto Lim (30:50.70) ug Orville Tecson (32;59.20) alang sa ikaduha ug ikatulo nga dapit.

Si Ramon Espinosa mao sab ang mipatigbabaw sa veterans class nga mi-oras og 38:10.66, samtang si Jun Edrina (39:13.73) mipuwesto sa ikaduhang dapit ug si Junasis Alicaway (39:59.62) mao ang mi-okupar sa ikatulo.

Sa beginners class, si Franklin Solasco mirehistro og 24:58.87 aron sakmiton ang kampiyonato, gisundan ni Rolly Cabaluna (25:38.62) ug Jessie Repunte (27:18.38) nga mipahiluna sa ikaduha ug ikatulo nga dapit.

Sa laing bahin, ang mga bikers gikan sa Oriental Negros maoy nangharos sa downhill competition.

Sila si Eleazar ug Wendell Barba maoy miangkon sa unang  duha ka dapit sa open class, samtang si Gregorio Alano mitapos sa ikatulo.

Sa executive class, si Jemuel Moreno midaog sa unang dapit nga mi-oras og 58.13 segundos. Si Victor Bagano mitapos sa ikaduha sa oras nga 59.54 segundos, gisundan ni Melo Anito nga mirehistro og 1:00.27. (Lemuel P. Maglinte)    (BANAT NEWS)