Kalidad Sa Dula

Maghisgot ta karon bahin sa standard sa kalidad sa dula. Wala ako'y irekomendar nga sukdanan kun scale nga angay tamdan mahitungod niini. Ang importante mao nga taas gayod ang kalidad sa performance sa magdudula segun sa iyang maabot.

Matag magdudula may iyang idolong bilyarista. Pananglit, si Pedro nag-idolo ni Efren 'Bata' Reyes. Si Juan nag-idolo ni Francisco 'Django' Bustamante. Ug si Pablo nag-idolo usab ni Alex 'The Lion' Pagulayan.

Dili kinahanglan nga tupngan nila ni Pedro, Juan ug Pablo ang kalidad sa performance sa tagsa-tagsa nila ka idolo aron sila ilhong hanas na sa pagdula og bilyar. Ang gikinahanglan mao nga base sa kaugalingon nilang estilo sa dula, taas ang kalidad sa ilang performance.

"You do not have to be of their standard to profit from it," nagkanayon si Ashok Kumar, ang tagsulat sa librong Snooker and Billiards.

Ang buot ipasabot ni Kumar nga dili na kinahanglang sundogon ug tupngan nimo sa tanang aspeto ang performance sa idolo nimong magdudula aron ikaw makabenepisyo sa imong pag-idolo kanila. Kay lahi ka man og estilo sa dula kay sa imong idolo sanglit ang estilo mao man mismo ang magdudula.

"You must have progressed to a point where positional play is within your grasp. You must, in other words, have an adequate command of screw and stun strokes, and that implies a reasonable understanding of where the cue ball is likely to wind lip after you have played them" dugang pasabot ni Kumar.

Dili daotan ang pag-idolo og magdudula. Pero sa kaugalingon mong aplikasyon sa dula, kinahanglang mopatigbabaw ang kaugalingon mong estilo. Ang standard sa kalidad sa dula mo kinahanglang maggikan sa kaugalingon mong kait-on. Sa maong paagi, masinati mo ang kakomportable panahon sa imong pagdula. Ug kun komportable ka, daku ang kahigayonan nga makakamada ka'g dakung score.

Ang scoring ability mao gyuy angay mong hatagan og prayoridad. Hinumdomi kanunay nga ang pagdula og bilyar dili daugon pinaagi sa exhibition kun dili sa pagpalabaw og score.

* * *

(Mga sugyot ug pakisayod? Text sa 0910-8105522)