CEBU, Philippines - Makahigayon na usab ang mga Sugbuanon nga mahiligon sa racing sa ipahigayong 3rd leg sa Philippine Autocross Championship Series karong adlawa diha sa Parkmall sa north reclamation.
Ang topnotch racers gikan sa DGL Motorports nga gipangulohan ni David G. Lim ug sa QQ/Cherry-sponsored team No Care Racing (NC) ang mag-arangkadahay, bisan og anaa ang presensiya ni Jess Garcia ug Justin Neri sa Kartzone, Randy Paray ug Ervin Go sa ACR.
Si Lim kasamtangang nag-una karon sa karera alang sa "Driver of the Year" award human makatigom og 16 puntos human sa duha ka legs. Nagsunod si John King sa Team NCR nga adunay 11 puntos, samtang sila si Mato Tan ug Justin Neri mihipos og otso puntos matag usa.
Si Randy Paray maoy ikalima nga adunay sayes puntos.
Mga kategoriya nga tigian mao ang novice stock A and C, novice modified A, B ug C, experienced modified A, B ug C, Open A, B ug C, all BMW, old school, all wheel drive, sports car, Papa Joe's rear wheel drive ug automatic transmission. – BANAT NEWS