Ang makalaban si Pacquiao ay parang tumama na rin sa sweepstakes

MANILA, Philippines - Kapag lumaban ka kay Manny Pacquiao, para ka na ring tumama sa sweepstakes.

Kaya naman masaya na si Puerto Rican world welterweight champion Miguel Angel Cotto kahit na 35-65 ang magiging percentage split nila ng Filipino boxing icon.

"One has to realized that Pacquiao has already been involved in some big fights and that has a great value inside the industry," wika kahapon ni Gabriel Penagaricano, ang tumatayong legal adviser ni Cotto, sa panayam ng El Nuevo Dia. "But the agreement is very good for Miguel."

Maghaharap ang 30-anyos na si Pacquiao at ang 28-anyos na si Cotto sa Nobyembre 14 sa MGM Grand Garden Arena sa Las Vegas, Nevada.

Sa kanyang huling laban kay Briton Ricky Hatton noong Mayo 3 sa MGM Grand, pumayag si Pacquiao sa 50-50 split ngunit sa huli ay nakakuha ng mas malaking halaga sa pay-per-view buys para sa kanyang $12 milyong purse.

Nakakulekta naman si Pacquiao ng $5 milyon mula sa kanyang ninth-round TKO kay David Diaz noong Hunyo 28 at $11 milyon sa kanyang eight-round TKO kay Oscar Dela Hoya noong Disyembre 6 buhat sa 32-68 split.

Maliban sa pagpayag sa 35-65 percentage split, pumirma rin si Cotto ng contract extension sa Top Rank Promotions ni Bob Arum kung saan mananatili siya sa susunod na dalawang taon.

"It was one of the clauses in finalizing the deal. I have been with them since the beginning of my career and I'm happy with them," ani Cotto, minsan nang hinikayat ni Dela Hoya na lumipat sa kanyang Golden Boy Promotions.

Halos 15 minuto lamang nag-usap sina Pacquiao at Arum noong Lunes para maplantsa ang naturang laban kay Cotto.

"Big things were achieved and we are happy with the negotiation. We are happy with everything that was achieved for this fight," sabi ni Cotto. "It is one of the most anticipated fights of this year." (Russell Cadayona)