CEBU, Philippines – Pakyas ang Team Cebu City sa pagdepensa sa ilang titulo sa juniors division, apan mipauli kini bitbit ang unom ka gold, pito ka silver ug upat ka bronze medals sa bag-o lang natapos nga 2009 Milo- National Open Invitational Track and Field Championship didto sa Don Narciso Ramos Sports and Civic Center, Lingayen Pangasinan.
Si Lindley Fran Navaja maoy mihatag sa katapusang bulawan sa TCC pinaagi sa 200m run sa oras nga 21.95 segundos. Gawas sa gold medal sa 200m run, gisakmit usab niya ang silver medal sa century dash.
Sa mens category, mihakot usab og bulawan si Anthony Santillan sa 100m run all-Pinoy class, samtang ang kanhi University of Cebu (UC) standout ug karon sakop na sa Philippine Team nga si Julius Nierras nisakmit usab og silver sa 200m run.
Gipakita usab ni Reymar Bautro ang iyang abilidad human niya gilangkat ang silver sa 400m hurdles, samtang si Vlessica Jagna mihakot sa ikaduha niyang bronze medal pinaagi sa 1,500m run.
Si Jagna uban nila ni Sheena Gacayan, Lera de la Calzada ug Jee-Ann Racoma mi-okupar sa ikaduhang dapit sa girls 4x400m relay.
Sila si Irin Baluran ug Ernesto Ybañez maoy daghang nahakot nga bulawan alang sa TCC nga adunay tagduha human manghawod sa long jump ug triple jump events. – BANAT NEWS