CEBU, Philippines - Gibulsa dayun ni Irin Baluran ang usa ka bulawang medalya alang sa Team Cebu City sa gipahigayung 2009 Milo-National Open Track and Field Championship kagahapon didto sa Don Narciso Ramos Sports and Civic Center sa Lingayen, Pangasinan.
Si Baluran misakmit sa bulawang medalya atol sa girls long jump event. Ang garbo sa University of Cebu nahimutang pa sa second place apan naningkamot kini aron masakmit ang first place.
Si baluran nirehistro sa iyang personal-best distance nga 5.33 meters aron malangkat ang gold medal.
Gawas sa gold medal, nakabawos na usab si Baluran batok sa usa ka Ilocos Sur jumper kinsa nipilde kaniya sa miaging PRISAA National Games.
Naglaraw karon si Baluran nga mangharus sa maong torneyo lakip na sa triple jump event diin siya maoy gold medalist niadtong miaging tuig.
Ang TCC nipadala og 13 ka mga atleta alang sa boys divison ug pito sa girls division. Ang mga atleta giubanan sa ilang mga coach nga sila si Babette Capangpangan, Zosiliana Erana, Genaro Macayan, Daniel Erana, ug Lyle Larida. - Lemuel P. Maglinte (BANAT NEWS)