Mahayahay sugamak sa SYBA

CEBU, Philippines – Wala mosalir ang 24-15 run nga gihimo sa Mahayahay sa final period dihang nasugamak sila sa mga kamot sa SYBA, 57-62 sa midget division sa Our Lady of Lourdes Parish Summer Saya Basketball League didto sa Our Lady of Lourdes Parish Gym sa barangay Punta Princesa, ning siyudad.

Ang SYBA nga usa sa mga semifinalists sa miaging tuig milabaw lang og dos puntos paghuman sa first quarter, 15-13. Luyo sa mga paningkamot nilang Ariane Baluyot ug Noriel Abellana, miburot ang maong labaw ngadto sa nuybe puntos sa halftime sa iskor nga 32-23.

Misiaw og maayo ang SYBA sa second half dihang yano kining mibuak sa huyang nga depensa sa Mahayahay aron pagposte og 14 puntos nga bentaha, 44-37 paingon sa final period.

Nakurat ang SYBA dihang ang Mahayahay pinaagi sa pagtambayayong nilang Melvin Bejarasco, Marleto Villantes ug Reychie Padayao mipabuhagay sa ilang kainit aron pagtunaw sa dakung labaw ngadto na lang sa singko puntos, 58-53 sa nahabiling sayes minutos sa duwa.

Apan nahulog sa lim-aw ang paningkamot sa Mahayahay kay sila si Colin Catamco ug Baluyot nagkumboya og 12 puntos aron ihatod ang SYBA ngadto sa ganghaan sa kadaugan.

Si Baluyot maoy topscorer sa SYBA pinaagi sa iyang 21 puntos, samtang sila si Noriel Abella ug Catamco miabuno og otso puntos matag usa.

Ang pilderong Mahayahay gipangulohan sab ni Bejarasco, kinsa miposa og 18 puntos, gisundan ni Padayao nga adunay 10 puntos.

Puntos Matag Usa

SYBA (62) - A. Baluyot 21, N. Abella 8, C. Catamco 8, A. Abella 6, R. Baisac 2

Mahayahay (57) - M. Bejarasco 18, R. Padayao 10, M. Villantes 6, J. Roflo 6, J. Nellas 4 – BANAT NEWS