CEBU, Philippines - Magsangka karon ang Pecus Stallions nilang ex-SWU Cobra Rey Potot ug Junior Sasing ug ang Cebu Movers System ni playing coach Boy Te sa knockout finals sa Guadalupe Athletic Association (GAA) 9th Founder’s Cup Second Conference diha sa Guadalupe Sports Complex.
Ang Stallions mi-abante ngadto sa finals pinaagi sa pagpukan sa 2171 Platoon nga gipangulohan ni Jimbo Noel, samtang ang Movers maoy nakaangkon sa ikaduhang luna human ilang gipalayas ang Evan Hulga Hardware nga gipangulohan ni ex-Tribu Sugbo coaching staff Gaga Cabanilla.
Ang duha ka kampo pulos adunay manirahay og tres ug gumikan niini makaangkon og bentaha ang koponan nga adunay lig-ong nga depensa. Ning bahina, mas nakapabor ang Cebu Movers kay mao kini ang hait nga hinagiban ni Te nga maoy nakapahimo kaniyang winningest coach sa kasaysayan sa GAA.
Sa miaging tuig, nakahakot og lima ka kampiyonato si Te sa nagkalain-laing liga dinhi sa dakbayan.
Si Potot maoy sinaligan kaniadto sa Cobras, apan dili niya masayon-sayon si Vincent Reyes sa Movers
nga manirahay sab og three-point.
Matud pa ni Te dili sila angay mokompiyansa ug ilang giisip si Potot nga dakung babag sa ilang kampanya. Paninguhaon sab nila nga ilang malimitahan ang produksiyon ni Potot.
Sa pasiunang duwa, ang Evan Hulga Hardware ug ang 2171 Platoon mag-ilog sa ikatulong dapit. – BANAT NEWS