Cebu City Mikabkab 15 ka bulawan

CEBU, Philippines - Mipakita og tilimad-on ang Cebu City dihang ang ilang swimmers ug trackters nagkorambos og 15 ka bulawan sa secondary division pagsugod sa 2009 Central Visayas Regional Athletic Association (CVIRAA) Meet kagahapon didto sa Lorenzo Teves Aqua Center ug sa Gov. Mariano F. Perdices Memorial Coliseum sa Dumaguete City.

Si Paula Abigail Vega sa University of Cebu (UC) mikabkab og tulo ka bulawan sa swimming pinaagi sa pagpanghawod sa 100m ug 200m backstroke ug sa 4x100 medley relay.

Sila si Jesse Arriola Jr. ug Seth Melendez mihatag sab og duha ka bulawan matag usa. Si Arriola naghari sa individual medley ug 200m freestyle event, samtang si Melendez nilangkat sa korona sa men's 100m ug 200m backstroke.

Mitunol sab og duha ka golds si Loren Dale Echavez sa University of San Carlos (USC) kortesiya sa 200m freestyle ug 4x100 medley relay diin iyang gikauban sila si Vega, Mafet Candia ug Christine Indaya.

Ang manghod ni Echavez nga si Ara Denise, midugang sab og gold sa 100m breaststroke.

Gidominar sab sa Niños ang boys 4x100m medley relay, samtang si Jebb Cane nag-una sa men's 100m freestyle.

Didto sa Gov. Mariano F. Perdices Memorial Coliseum, si Carl Jeanette Malazarte, kinsa dili makatambong sa graduation rites karong adlawa, nanghawod sa 1,500m run sa oras nga kuwatro minutos ug 22 segundos. Si Malazarte nangandoy sab nga maka-gold sa steeple chase ug sa 5,000m run events.

Sa laing bahin, sila si Kennick Alivio ug Kristy Kaye Vinco nihakot og usa ka bulawan matag usa sa boys shot put (10.60m) ug women's high jump (1.43m).

Sa elementary division, ang Niños mipugnit og upat ka bulawan sa swimming. Si Trina Cañed nanghawod sa 50m backstroke, samtang si Danielle Mae Ballesteros naghari sa 100m breaststroke.

Giharos sab sa Niños ang boys 4x100m freestyle relay ug girls 4x100m medley relay. – BANAT NEWS