Melindo away na karon batok Fundi

CEBU - Miabot na ang panahon aron isugal ni World Boxing Organization (WBO) Asia-Pacific mini flyweight champion Milan Melindo ang iyang titulo dihang iyang sangkaon ang sikat nga African warrior Juma Fundi karong adlawa sa Atrium sa Limketkai Mall sa Cagayan de Oro City.

Higayon na usab kini ni Melindo nga ipakita ang tanan niyang tinagoang abilidad atubangan sa iyang paysano batok sa langyaw'ng si Fundi kinsa nidaog og walo sa siyam niya ka mga away ug ang bugtong niyang pilde batok ni WBO Oriental champion Richie Mepranum.

Sila si Melindo ug Fundi parehong mikulit og daog sa katapusan nilang away. Si Melindo midaog batok ni Carlos Melo sa Panama sa ilang away alang sa WBA Intercontinental lightweight niadtong Hulyo ning tuiga, samtang si Fundi nidaog sab dihang iyang gipaundang sud lang sa unang round si Sadat Miyeyusho niadtong miaging Agosto.

Ang maong boxing card mao unya ang hagdanan ni Melindo alang sa internasyonal nga mga away, apan magdepende kini sa iyang performance karong gabii.

Sa supporting main event ning maong boxing card nga gipasiugdahan sa nabantog na kaayong ALA Promotions uban sa suporta ni Misamis Oriental Governor Oscar Moreno, si WBO Asia-Pacific Youth champion Jason Pagara moaway alang sa bakanteng Philippine lightweight title batok ni RP No. 4 contender Arnel Porras sa General Santos. – BANAT NEWS