Ave Maria nagsolo sa ikaduhang dapit

CEBU - Gipuga sa Ave Maria Sanctuary Park ang ilang abilidad sa nanghinapos nga bahin sa duwa aron pagposte og 68-61 nga kadaugan batok sa Jeff Pharma sa nagpadayong aksiyon sa 6th M. Lhuillier Kwarta Padala Under-21 Developmental Basketball League didto sa Consolacion Sports Complex.

Ang Ave Maria ni coach Marlon Piodo milabaw og tres puntos, 20-17 sa unang kuwarter, apan ang Jeff Pharma mi-rally sa second quarter aron pag-ilog sa labaw sa halftime, 33-31.

Ang Jeff Pharma nga gibitoonan sa mga magduduwa gikan sa University of San Carlos (USC) kanunay naglabaw human sa tulo ka kuwarter, apan nahutdan kini og hangin sa labing hinungdanon tipik sa panahon sa maong duwa.

Gumikan niini, gipahimuslan sa Ave Maria ang higayon ug ilang gitapos ang duwa pinaagi sa pagpabuto og 18-10 aron pagpilde sa Jeff Pharma.

Sa maong kadaugan, ang Ave Maria nagsolo karon sa ikaduhang dapit bitbit ang 2-1 win-loss record ning duha ka bulan nga torneyo nga gipaluyohan sa M. Lhuillier Sports Development Foundation (MLSDF) pinaagi sa paningkamot sa ilang executive director ug multi-titled coach Eddie B. Ybañez.

Ang kampiyon makaangkon og P5,000, ang second placer mobulsa og P3,000 ug ang third placer makadawat og P2,000.

Tungod kay ang maong kalihukan adunay katuyoan, ang mga premyo idonar ngadto sa mga charitable institutions agad sa kabubut-on sa mga winners.

PUNTOS MATAG USA

Ave Maria SP (68) - Montenegro 17, De la Rama 15, Abing 13, Regalado 9, Igoña 6, Senining 4, Morales 2, Trillo 2

Jeff Pharma (61) - Candari 10, Fernandez 9, Areja 8, Resilla 8, Tagaloguin 7, Castañeda 5, Tiu 5, Lasala 4, Dinsay 3, Gallur 2 (BANAT)