Human giharos ang upat ka leg championships, ang M. Lhuillier-Cebu Niños ni sports patron Michel J. Lhuillier ug coach Raul "Yayoy" Alcoseba magsugod na og atiman sa mas malisud nga hagit karon adlawa sa ilang pag-host sa Trace-Laguna Stallions sa Game 1 sa best-of-five quarterfinals sa Smart Liga Pilipinas National Playoffs diha sa Cebu Coliseum.
Ang Niños ug ang Stallions magsangka sa alas 6:00 sa gabii human sa pasiunang duwa tali sa Pagadian Explorers ug Misamis Oriental Meteors nga gikatakda sa alas 4:00 sa hapon.
Ang Niños mipayaka sa Stallions sa duha nila ka duwa sa eliminasyon sa iskor nga 105-68 didto sa Pagadian ug 90-69 dinhi sa ilang balwarti. Laktod pagka sulti, ilang gilubong og 29 puntos matag duwa ang Stallions.
Apan lagmit nga dili na kini mahitabo sa ikatulo nilang panag-abot gumikan kay nindot na man kaayo ang gipakitang labok ug dagan sa duwa sa Stallions. Gani sila maoy nanghawod sa ikapitong semana sa Liga Tour Phase.
Hinoon dili sab basta-basta ang M. Lhuillier gumikan kay gipalig-on niini og samot ang ilang puwersa pinaagi sa pagkuha sa beteranong forward nga si Jercules Tangkay ug sa idlas nga torotoy nga si Ronald Bucao. Apan tungod kay 14 ra man ang lineup nga gitugot matag team, si coach Alcoseba mibutang nilang Michael Luga ug Jay-R Atablanco ngadto sa reserve list.
Sa gihapon, mangu sa opensiba sa M. Lhuillier mao ang two-leg MVP Bruce Dacia ug ang lain pang duha ka leg MVP nga sila si Marlon Basco ug Stephen Padilla. Makigduyog kanila mao sila si Mark Ababon, Jayford Rodriguez ug Ronald Capati.
Sa habig sa Stallions, ilang lauman nga mo-abaga sa ilang opensa mao sila si Jerwin Gaco, Abby Santos, Nat Cruz, Glen Bolocon ug Ricky Ricafuente.
Sa laing bahin, ang serye tali sa Pagadian ug Misamis adto unta kumbatihan sa Pagadian apan gibalhin kini dinhi sa Sugbu gumikan sa talandogon nga kahimtang sa kahapsay ug kalinaw didto sa Mindanao.