MLSDF-Don Bosco nanghawod sa beach soccer

Naangkon sa M. Lhuillier Sports Development Foundation (MLSDF)-Don Bosco ang daginutong 1-0 nga kadaugan batok sa Bacolod City United aron paghari sa 2008 National Beach Soccer Championships niadtong Domingo sa San Carlos City, Negros Occidental.

Ang maong kadaugan maoy tam-is nga panimalos alang sa MLSDF-Don Bosco, kinsa naparot sa mao gihapon nga karibal atol sa final match sa Cebu eliminations sa miaging semana didto sa lungsod sa Moalboal. Ang MLSDF-Don Bosco ni coach Jose Maria Aberasturi, SBD, misakmit sa kampiyonato nga wala mamansahi og pilde sa unom ka duwa.

Gisugdan sa MLSDF-Don Bosco ang ilang kampanya pinaagi sa pagkulit og 2-1 nga kadaugan batok sa Bacolod. Human gisirohan ang San Carlos Team-A, 6-0, mikubkob sab sila og susamang 2-1 nga kadaugan batok sa Dumaguete City ug sa San Carlos Team-B. Gisirohan sab nila ang Cebu Province, 3-0 aron pag-angkon og luna sa finals.

“I’m very happy. The Bosconians really proved they are worthy of our support. My congratulations to the entire team for bringing honor and pride not only to MLSDF, but also to the Cebu sporting community,” matud pa ni MLSDF executive director Eddie B. Ybañez.

Show comments