Ang University of San Jose-Recoletos (US-R) Lady Jaguars yano kaayong miposte sa ilang ikaupat nga daog pinaagi sa pagpukan sa Southwestern University (SWU) Lady Cobras, 25-11 ug temporaryo karong nag-una sa 2nd Cebu Schools Athletic Foundation Inc. (CESAFI) beach volleyball tournament didto sa Inayagan Beach Resort sa Naga City.
Ang Lady Jaguars ni Cebu Hall of Famer coach Grace Antigua maoy midala sa duwa gikan sa pagsugod hangtod na sa katapusan hinungdan nga mikisikisi ang Lady Cobras.
Haom kaayo ang tandem sa mga kanhi junior RP Team members nga sila si Genie Sabas ug Michelle Simbajon sa USJ-R ug ilang gipahimuslan ang ilang kasinatian sa duwa pinaagi sa ilang walay puas nga pangataki ug ingon pagpatuman sa lig-on nga depensa nga igo na kaayo sa pagpalagpot nilangi Lorie Mae Layno ug Jessa Satina sa SWU Lady Cobras ni coach Janeth Ponte.
Daku na kaayo ang kahigayonan sa USJ-R Lady Jaguars nga ilang makuha ang korona karong tuiga sa women’s division.
Sa men’s division, ang USJ-R Jaguars nagpabilin gihapon nga walay pilde ug nagtangag sa 3-0 win-loss record.
Sa laing bahin, ang USPF Panthers mipukan sa University of Cebu (UC) Webmasters, 25-23.
Ang UC Webmasters ni Jonathan Inez ug John Francis Llaguno naninguha nga mogukod sa iskor apan napakyas kini pagbaraw sa kainit sa duwa nilang James Ryan Rivera ug Edward Ybañez.
Wala makapugong ang naglagiting nga kainit sa adlaw sa tandem ni two-time Cesafi Men’s Volleyball MVP Roderick Arenasa ug Edward Carlo Tecson sa USC Warriors ug ilang gipukan ang Cebu Doctor’s University (CDU) Stallions, 25-12.
Ang kulbahinam nga mga duwa padayon karong Marso 8 sa mao gihapon nga binyu.