Sila si Rey ''Boom Boom'' Bautista ug AJ ''Bazooka'' Banal nga moabot karon sa Manila luwan sa Philippine Airlines gikan sa Las Vegas, lab-as pa gikan sa ilang pagkulit og impresibo nga kadaugan sa undercards sa away nilang Oscar de La Hoya ug Floyd Mayweather niadtong Domingo didto sa MGM Grand Garden Arena sa Las Vegas, Nevada.
Ang 20-anyos nga si Bautista nidaog pinaagi sa unanimous decision batok ni Sergio Manuel Medina sa Argentina sa 12 ka hugna nilang WBO super bantamweight eliminator.
Mao sab ang 18-anyos nga si Banal kinsa nidaog sab pinaagi sa unanimous decision batok ni Juan Alberto Rosa sa Mexico sa walo ka hugna nilang kumbati.
Ang duha adto una magpalabay sa ilang kagabhion sa kaulohan uban ni sports patron ug tagdumala sa ALA Boxing Gym nga si Antonio Lopez Aldeguer.
Sumala pa ni Aldeguer nga ang duha niya ka mga boksidor mopahigayon og press conference diha sa Marriott Hotel.
Si Bautista lumad nga taga Candijay, Bohol, samtang si Banal lumad nga taga Corella, Bohol. Ang duha gikatakda nga mohatag og courtesy call ngadto ni Tagbilaran City Mayor Dan Neri Lim.
Sa laing bahin, ang kagamhanan sa dakbayan sa Tagbilaran nag-andam og usa ka bonggang heroes’ welcome sa duha ka Bol-anong boksidor sa ilang pagbalik sa Bohol karong Sabado.