Bisan pa man sa ilang kadaugan, alkanse gihapon ang VFI-USJ-R sa serye, 1-2 ug nagtinguha kini nga makatabla sa serye sa Game-4 karong adlawa nga gitakda sa alas-5:00 sa hapon diha gihapon sa Cebu Coliseum .
Maharos unta sa CDO Hamburger-UV ang serye, 3-0 bisan og wala ang sinaligan niining sentro nga si Rino Berame gumikan kay nakahimo gihapon sila pagbuak sa depensa sa Jaguars ug gani milabaw pa kini og 16 puntos, 48-32, sa nahibiling 30 segundos sa ikaduhang kuwarter.
Apan ang CDO Hamburger-UV nahutdan sa kaisog sa gipakitang kabangis sa VFI-USJ-R Jaguars.
Human napatabla ni Manny Gabas ang iskor 78-78, si Ryan Arpay nipusgay og medium range jumper aron pagpa-abante og dos puntos sa VFI-USJ-R sa iskor nga 80-78.
Apan giilog sab dayon sa CDO-UV ang labaw, 81-80 human sa tres ni Ritchum Dennison sa nahibiling tulo ka minutos sa duwa. Sa wala damha, ang CDO-UV nakahimo og mga turnovers sa naghinapos nga bahin sa duwa hinungdan sa ilang pagkahagba.
Silang Gabas, Lydon Gudez ug Justiniani maoy nangulo sa VFI-USJ-R nga pulos mihipos og 23 puntos.
Mao kini ang ikaduhang higayon sa VFI-USJ-R nga nidaog sa gamhanang CDO-UV sa Partner's Cup. Una, sa elimination round sa iskor nga 77-72.
Apan sa ilang panagbagat karon mausab na sab ang templada sa duwa sa CDO-UV gumikan sa pagbalik ni Berame ug ni Randy Pogoy sa VFI-USJ-R gikan sa ilang usa ka duwa nga suspensiyon tungod sa ilang panagbangi atol sa Game-2.
MGA ISKOR
VFI-USJR (87)
Justiniani 23, Gudez 23, Gabas 23, Delfino 8, Ponce 4, Hatague 3, Arpay 2, Malinao 2
CDO-UV (81)
Akad 18, Lanete 17, Luga 9, Dennison 8, Arda 7, Esperat 7, Sendrijas 6, Manigque 3, Canoy 3, Omolon 2,
Diputado 2, Villanil 2