Kini way lain kondili ang pag-abiba sa idolo sa mga Pinoy nga si Manny Pacquiao kinsa makigsinukliay na og kumo karong adlawa batok ni kanhi two-time world champion Oscar "Chololo" Larios sa main event sa "Mano-a-Mano Philippines vs. Mexico" card dinhi sa makasaysayanon nga Araneta Coliseum.
Gumikan kay ang paglaum sa mga Pinoy nagsandig sa iyang mga abaga, si Pacquiao nagbitbit sab karon og bug-at nga tahas sa pagpanalipod dili lamang sa iyang WBC International super featherweight title, apan lakip na sab sa garbo ug dungog sa nasud.
Ang kumbati nilang Pacquiao ug Larios gikatakda alas 11:00 sa buntag ug kini maoy motak-op sa upat ka special bouts nga ipasalida live pinaagi sa satellite sa ABS-CBN sa "pay-per-view."
Magsugod ang kumbati sa alas 8:00 sa buntag diin si ALA ring star Czar Amonsot moharong ni Silverio Ortiz. Si kanhi WBC super flyweight champion Gerry Peñalosa moharong ni Tomas Rojas ug sundan kini sa away nilang Jimrex Jaca ug Hector Marquez sa alas 10:00 sa buntag.
Atol sa official weigh-in kagahapon didto sa Discovery Suites, sila si Pacquiao ug Larios nakakuha og saktong timbang.
Si Larios (56-4-1, 36KOs) mitimbang og 129 ka libras, samtang si Pacquiao (41-3-2, 33KOs) adunay gibug-aton nga 129.5 ka libras.
Si Rafael Mendoza, nga maoy nag-atiman ni Larios, nagkanayon nga naglantaw sila sa usa ka malisud nga away apan iyang gipahibawo nga ang iyang bokser andam sa bisan unsang atake nga iyagyag ni Pacquiao.
Hinuon, matud ni Mendoza nga nakapabor si Larios kun makalahutay kini sa pag-atake ni Pacquiao.
Lahi hinuon ang pangagpas sa trainer ni Pacquiao nga si Freddie Roach, kinsa nagkanayon nga si Pacman andam nga makigbinakbakay sud sa 12 ka hugna sama sa miaging away niini ni Juan Manuel Marquez ug sa una niining engkuwentro ni Erik Morales.
Subli nga gipahayag ni Roach nga si Pacquiao nagtinguhang motumba ni Larios sud sa unom ka hugna.
"I don't want this fight to go beyond eight rounds. He will break down this guy in the middle rounds. The most is six," dugang pa ni Roach.
Lain pang away angayan nga tan-awon sa maong promosyon nga gipasiugdahan sa television giant ABS-CBN inabagan sa MP Promotions Inc. mao ang kumbati nilang RP bantamweight champion Michael Domingo ug Alejandro Felix Montiel ug ingon man ang sangka nilang kanhi OPBF lightweight champion Dennis Laurente ug Russian Rustam Nugaev.