Katatagan sa puwesto asam ng Blu

Hangad ng Blu All-Purpose na mapanatili ang kanilang kapit sa ikalawang puwesto laban sa LBC-Batangas habang asam naman ng Sunkist-Pampanga na manatili sa kontensiyon sa pagpapatuloy ngayon ng aksiyon sa ikalawang round ng elimination phase ng 2002 PBL Challenge Cup sa Makati Coliseum.

Nais ng Detergent Kings na may 6-2 record na maduplika ang kanilang 93-75 panalo kontra sa Batangas Blades noong November 9 sa muli nilang paghaharap sa alas-5:00 ng hapon.

Ngunit kung mananalo ang LBC-Batangas na may 5-3 kartada, makikisalo ito sa ikalawang puwesto.

Importante din ang panalo para sa Sunkist Juicers sa kanilang laban kontra sa Cheese Balls sa alas-3:00 ng hapon na simula ng kanilang kinakailangang four-game sweep na magkakaloob sa kanila ng insentibo.

Bagamat napakalayo ng Sunkist na may 1-7 record, may tsansa ang RFM-franchise sa play-off sa top team ng Group B para sa karapatang kalabanin ang no. 4 ng Group A kung saan nakataya ang huling semis berth.

Ang Juicers ang underdog sa labanang ito dahil sa kanilang 74-97 pagkatalo sa Cheeseball noong Nov. 7.