Mga molupyo nga maapektuhan sa 4th bridge project nabalaka
CEBU, Philippines — Gipasalig ni Mandaue City Mayor Thadeo Jovito "Jonkie" Ouano sa mga residente sa Paknaan nga maapektuhan sa pagtukod sa fourth bridge project nga sila pabalhinon sulod ra gihapon sa maong dapit ug dili layo sa ilang gipuy-an karon.
Gitug-an ni mayor Ouano nga dunay 204 ka mga maapektuhang residente sa Barangay Paknaan, ang nipadangat sa ilang tinguha nga mopuyo gihapon sa lugar gumikan sa ilang panginabuhian.
Ang Department of Public Works and Highways (DPWH) nakig alayon sa kagamhanang lokal sa dakbayan aron hawanan ang dapit diin itukod ang maong taytayan.
Gipasabot sa mayor nga kasamtangang puno na ang socialized housing facilities sama sa Pasilong sa Paradise, Paglaum, ug Bayanihan Village sa Barangay Guizo.
“Wala man sad tay kabalhinan nila lain. Kung magsugod na ang construction didto, i-allow lang sa nato kay mao man sad to ilang request,” sumala pa niya.
Ang pagpatukod sa bridge giplanuhang sugdan sa ikatulong kwarter sa tuig 2026.
Gibana-bana nga nagkantidad og P76.412 bilyon ang ika-upat nga taytayan, ug pondohan kini sa Japan International Cooperation Agency (JICA).
Base sa gisugyot nga alignment, ang maong bridge ug coastal road moagi sa E.C. Ouano Wharf, nga mokonekta sa Zuelig Road, ug mo sumpay sa Lapu-Lapu flyover padulong sa Mandaue City.
Una niini daghang residente labi na ang mga trabahante sa paghimo og silhig sa Paknaan, ang nabalaka nga mawad-an ug panginabuhian.
Suma pa ni Apple Gitgano, 26 anyos, usa ka manghimuay og silhig nga otso anyos siya nagsugod og nagtrabaho sa industriya sa paghimo og silhig, nga maoy namat-an niya sa iyang mga ginikanan ug uban pang kaliwat.
Nanghangyo si Apple nga unta ma-relocate sila sulod sa Barangay Paknaan aron makapadayon sila sa ilang panginabuhi ug mapadayon usab sa eskwela ang ilang mga anak.
Gipadayag usab niya nga dili sila supak sa maong relocation basta dili lang sila ibalhin og layo sa ilang panginabuhi. — Mia D. Esplaguera (BANAT NEWS)
- Latest
