P360 milyong nalugi sa gobyerno sa 19K ‘ghost students’

MANILA, Philippines — Tinatayang P360 milyon ang nalugi sa gobyerno dahil sa mahigit 19,000 undocumented o ghost students na nakatanggap ng voucher mula sa Expanded Government Assistance to Students and Teachers in Private Education (E-GASTPE) program ng Department of Education (DepEd).

Ayon kay Sen. Sherwin Gatchalian, chairman ng Senate Committee on Basic Education sa pagdinig ng Senado, lumalabas na sinisingil ng mga pribadong eskwelahan ang gobyerno gayung wala namang maipakitang patunay o dokumento na nag-eexist o tunay ang mga estudyante.

Kaya tanong tuloy ng senador, kung hindi mapatunayan ang mga mag-aaral na ito ay matatawag na ba ang mga ito na “ghost students” subalit sagot ni Rodrick Edsel Malonzo, Monitoring and Processing Officer ng Private Education Assistance Committee, sa ngayon ay itinuturing pa lang nila ang mga ito na “undocumented students”.

Batay naman sa imbestigasyon ng Commission on Audit (COA), nasa 115 senior high school student beneficiaries noong school year 2016-2017 ang ikinunsidera nilang “ghost students” matapos na dalawang beses silang makakuha ng voucher sa loob ng isang taon.

Paliwanag naman ni Imelda Celso ng COA, hindi rin naman talagang matatawag na ‘ghost students’ ang nairekord dahil nagkaroon ng error sa monitoring at sa listahan ng mga benepisyaryo matapos na dumoble ang nakuha ng mga ito na voucher.

Aabot naman sa P239 million ang kailangang i-refund o ibalik sa voucher program dahil sa mga undocumented students.

Sa pagtaya naman ni Gatchalian, bukod sa posibleng ghost students, may aabot sa P7 bilyon pa na leakage sa voucher program dahil hindi napupunta sa target students.