Gihimong panakip butas?

Dear Tito Miguel,

Ako diay si   Chrissa Mae  taga  Barangay Sambag 1, CebuCity. Upat ka buwan na ko nga single  kay nagkabuwag mi sa akong ex-BF nga bata-bataon. Dunay  lalaki nga nagparamdam nako sa first week sa  January. Ako hinuon siya gi-entertain, para mawala akong kalaay. Hinuon naka-move on naman sad ko sa akong ex-BF.  Ang  bag-ong lalaki nga nagpa-cute nako ginganlan og Francis. Apan nagduda ko Tito Miguel, kay   bag-o lang sila nagbuwag sa iyang ex-GF. Pero moingon siya naka-move-on na daw siya. Nahadlok ko kay basin himuon rako niya nga panakip butas.  Ako naba hunongon ang pag-entertain kaniya? — Chrissa Mae

* * *

 Chrissa Mae,

Pareha man mo single, hatagi lang siya og  higayon, apil ang imong kaugalingon. Tinuod, dunay purohan nga gamiton ka niya nga panakip butas. Apan duda ra na nimo. Posible insakto imong pangagpas, puwede sab nag una ra’g nagdako imong hunahuna. Pasagdi siya modiskarte, apan panid-i. Paminaw’g maayo sa iyang mga pulong, labi na’g iyang hisgotan iyang ex ug kun unsay nahitabo kanila. Paminawa’g maayo iyang tono, suko pa ba siya, nasakitan, gianugnan o bitter. Ka’y kun mao ni imong mamatikdan, posible wala pa siya ka move on.

Gani, dili  na unta siya angay maghisgot kun hingpit na siya nakaipsot. Apan kun maghisgot, pangutan-a nganong nagbuwag sila. Kun siya ba ang giilad o nangilad. Kun siya ang giilad, posible suko siya’g dili pa makadawat. Kana maoy delikado, kay nagpas-an siya’g bagahe, kanimo ipasa aron mogaan ug makalingkawas siya. Kun siya ang nangilad, pagmatngon kay kana red flag. Apan lagmit dili na moangkon, ang babaye gyud iya pakasad-on. Busa, paniid ug paminaw samtang siya nagparamdam kanimo. Kun sige’g hisgot sa iyang ex, buot pasabot iyang hunahuna tua didto apan ang lawas nag-atubang kanimo.

Apan kun ikaw ra iyang gitutokan sa iyang pagparamdam, hatagi’g higayon. Basin diay matinud-anon. Ganahan ka niya. Ka’y kun dili pa, nibalibad na unta ka. Pero nagduha duha ka, sakyi lang sa. Tutal nagparamdam pa man kaha, ayaw hikawi imong kaugalingon sa posibilidad nga ang gitagana kanimo imo na’ng nakaplag. Sugal ang gugma, di gyud ka makadaog kun dili ka mopusta. —Tito Miguel

Magpatambag ka? Ipada kang Tito Miguel: 0991-318-9366