Ang kaminyoon ning kapanahonan karon

Nahimong mahinungdanong kabahin sa atong kinabuhi sa pagtuo ang hut-ong sa mga minyo.

Kini tungod kay ang salag sa kaminyoon ingon man ang pamilya ang pagatawgon man nga domestic churches. Pasabot lamang nga substantial part sa katilingban ang pamilya busa angayan lamang kining palig-onon.

Angayan lamang kining labanan ug palipangon. Dinhi sa akong Parokya gihimo gyud nako ang makanunayong home visit halos kada adlaw. Tumong nako mao man ang paghatag og higayon nga maduaw nako ang pamilya ug masayud ako sa ilang panginahanglan.

Kapoy man tuod apan fulfilling. Kapoy man tuod apan makahuloganon. Ang among gihimo mao man ang pagrosaryo, pagsab-ong sa eskapularyo ug pagbendisyon sa panimalay. Human niana mangaon kun dunay giandam. Apan ang mahinungdanon mao nga sila ikauban.

Niabot tuod ang gadgets alang social communications ug nahimong mas dali ang communication bisan gikan sa halayo apan ang nahitabo nahimo kitang hilom ug walay pagtagad kanila nga anaa sa atong duol.

Kining maong kasinatian maoy nakapahimo natong halayo sa usag-usa bisan anaa ra kita sa duol.

Daghan ang kaaway ang kaminyoon. Naglangkob kini sa sayop nga ideolohiya, panlantaw ingon man balansayon.

Bisan gani ang pakighilawas ingon nga sagradong buhat tali sa babaye ug lalaki nahimo naman hinuong usa ka halad o pasalubong sa pipila.

Gani ang uban gihimong pambayad sa utang. Daghan sa mga nagminyo ang wala man gani masayud sa ilang gisudlan nga kinabuhi.

Kun dili sila malipay mahimong asawa o bana isalibay. Luoy ang mga anak nga mahimong magkagidlay.

Sa matag higayon nga ako moduaw nakita ko ang katahum gyud unta sa pamilya apan unsaon ta man nga ang tinuod mao nga dunay mga pamilya nga samaran ug nagkinahanglang magpaalim pa diha sa kahilom. Hinuon, sayud ko nga gamhanan ang pag-ampo.