2 patay, 6 sugatan sa bumaliktad na trike
SANTIAGO CITY, Isabela MANILA, Philippines — Dalawang babae ang nasawi habang anim pa ang sugatan matapos na bumaliktad ang sinasakyan nilang tricycle sa bahagi ng Brgy. Limbunan, San Pablo sa lalawigang ito kamakalawa ng gabi.
Namatay agad sa pinangyarihan ng insidente bunsod ng matinding pinsala sa ulo ang mga biktima na sina Lourdes Natividad at Marivic Teppang, 45; kapwa residente ng Brgy. Limbuan sa nasabing bayan.
Ginagamot naman sa Cagayan Valley Medical Center ang mga sugatan na nakilalang sina Jessie Lazaro, Romelia Caruna, Perla Arugay, Reynalin Mariano, isa pang 16-anyos at ang driver ng tricycle na si Rondy Paguigan, 24, ng Brgy. Calamagui.
Sa imbestigasyon, nakisakay umano ang mga biktima sa behikulo ni Paguigan na noon ay papuntang bayan para magpagiling ng palay subalit nang pabalik na ay nawalan ng kontrol sa manibela ang driver sa paliko at pababang bahagi ng kalsada at sa dami na rin nilang nakasakay dakong alas-6 ng gabi.
Dahil dito, bumaliktad umano ang sasakyan at tumama sa konkretong railings ang mga tumalsik na biktima at napuruhan sa ulo ang dalawa sanhi ng kanilang kamatayan.
Mabilis namang isinugod sa nasabing pagamutan ang anim na nasugatan sa iba’t ibang bahagi ng kanilang katawan.
- Latest