Bisan naglisod, nisuway ang kampo ni Bise Presidente Sara Duterte sa paglalis sa mga ebidensiya sa prosekusyon sa iyang pag-angkon nga duna na siyay gisugo ug nisugot na ang iyang gikasulti nga patyon silang Presidente Ferdinand Marcos Jr., First Lady Liza Marcos ug kanhi House Speaker Martin Romualdez kon dunay mahitabo niya.
Nag-usab-usab ang ilang depensa: Una, niingon nga walay hulga; ikaduha, nanghulga si VP Sara kay giunhan og hulga nga hutdon ang iyang pamilya; ug ikatulo, dili seryuso ang hulga kay walay ebidensiya nga duna siyay gikontrata nga hitman.
* * *
Mas maglisod sila sa paglalis sa inig abli na sunod semana sa mga dokumento ni VP Sara nga isumiter sa siyam ka mga bangko sa Metro Manila ug Davao City, Anti-Money Laundering Council (AMLC) ug Bureau of Internal Revenue (BIR).
Nisuway sila sa paghatag og laing kahulogan sa iyang mga hudlat ug balikas sa video sa online nga press conference niadtong Nobyembre 23, 2024. Unsaon man pagkuwestiyon ang mga numero sa iyang bank accounts ug transactions ug income tax returrns (ITRs) ni VP Sara ug sa iyang bana, si Atty. Mans Carpio?
* * *
Lahi sa public statements ni VP Sara nga mahimong lubagon, ang financial records imposibleng maniobrahon:
Dili sila kapasangil nga makigkonsabo sa prosekusyon ang siyam ka branches sa mga bangko nga ilang gipili, sa ato pa gisaligan, pagdumala sa ilang kuwarta sa daghang katuigan;
Dili kapangugat nga peke ang reports sa AMLC kay direktang naggikan sa ilang paboritong mga bangko; ug
Dili kakuwestiyon sa ITRs sa BIR kansang buhis gipasikad sa income nga si VP Sara ra sab ang nagdeklarar.
* * *
Mao nga makapaabot kita og mas agresibo nga mga paningkamot sa mga abogado ug mga abogada ni VP Sara (inabagan sa alyado nilang senator judges nga nihukas na sa tanang takoban sa ilang pagpangabogar para niya) sa pagpugong nga ang financial records mapresentar isip mga ebidensiya sa impeachment trial.
Kay mas lisod depensahan si VP Sara kon mabisto nga dunay binilyon ka pesos sa iyang accounts, nga dili motakdo sa minilyon ka pesos sa iyang statements of assets, liabilities and net worth (SALNs) ug sa posibleng mas ubos pang kantidad sa ITRs.
* * *