INC dili labaw sa balaod
Nagduha-duha gihapon ang administrasyon ni Presidente Ferdinand Marcos Jr. kon unsay angay buhaton sa pag-abuso sa Iglesia ni Cristo (INC) sa iyang impluwensiya sa politika. Padayon bang mahadlok ang gobyerno sa bloc voting sa INC? O panahon na bang ipakita nga ang balaod patas para sa tanan?
Mahuyang ang demokrasya kon adunay grupo nga tan-awon nga magpatuo–ug mapamatud-an–nga dili matandog. Ang 1987 Constitution naghatag og kagawasan sa relihiyon. Pero wala kini magpasabot nga ang bisan unsang relihiyon makapamugos nga labaw sa balaod.
* * *
Ang pagsuway sa INC sa pag-impluwensiya sa sistema sa hustisya, pagpamugos sa mga opisyal, o pagtapok sa ilang mga sakop aron tabonan ang ilang opisyal gikan sa legal nga proseso, angayng tubagon sa hingpit nga pagpatuman sa balaod. Aron pamatud-an nga ang mga kaso ipasikad sa mga ebidensiya dili sa politikanhong braso.
Dili makadasig sa katawhan sa pagsalig sa gobyerno kon ang ordinaryong mga Pilipino kinahanglan nga mosunod sa balaod. Pero duna say mga organisasyon nga kublan tungod sa ilang pagpatuo nga makapadaog og lokal ug nasudnong mga politiko. Kon dili na makasalig ang katawhan sa mga institusyon, mangita sila og laing mga paagi–nga mahimong dili sama kamakiangayon ug kamalinawon–sa pagpangita og hustisya.
* * *
Dili angay’ng hilabtan sa gobiyerno ang INC isip relihiyon. Pero angay’ng undangon ang ilang ka-arogante sa pagpili unsay mga balaod nga tumanon ug unsay yatakan. Ang mga sakop sa INC ug ubang mga relihiyon dunay kagawasan sa ilang pagtuo ug sa pag-apil sa politika isip mga lungsoranon.
Pero ang organisasyon mismo, sama sa ubang institusyon, kinahanglan usab nga manubag kon dunay paglapas sa balaod. Ma-pari man sa Simbahang Katoliko o ma-politiko man nga INC.
* * *
Panahon na nga mohunong ang gobyerno sa pagpadala og nagkasumpaki nga mensahe. Kon tinuod nga dunay ebidensiya sa plunder, ipadayon ang pagkiha ni Senador Rodante Marcoleta. Pero kinahanglan sab ang matinud-anong imbestigasyon sa flood control scandal. Ipatuman ang balaod nga walay kahadlok ug walay pinalabi.
Ang tinuod nga sukdanan sa usa ka demokratikong gobyerno dili ang kaandam sa pagpatuman sa balaod batok sa mga gagmay. Kon dili ang katakos sa pagpahamtang sa balaod bisan batok sa labing dagko.
* * *
- Latest
