Panaghiusa ang kinahanglan

Nakaani og nagkadaiyang reaksiyon sa mga netizens ang nagpadayong protesta nga gipahigayon sa mga sakop sa Iglesia ni Cristo (INC) didto sa EDSA sugod niadtong adlawng Martes. Samtang nakigbatok ang INC sa inhustisya, kurapsyon ug selective justice, aduna’y misaway sa ilang protesta tungod kay nakahatag kini’g kahasol sa uban.  Bisan kon unsa pa ka mahinungdanon ug makatarunganon ang kawsa nga gibarugan, kon ang katawhan wala magkahiusa, dili gayod molampus ang katuyoan sa protesta. Angay unta kita motamod sa panultihon nga, “Kinahanglan maantigo kita magkinabuhi isip managsoon, kay kon dili, mahanaw lang kita isip mga buang.”  Madahaan!

Exempted ang gamhanan

Gihulagway ni Batangas First District Rep. Leandro Leviste nga “selective justice” ang moabotay nga pagpasaka og plunder case batok kang Senador Rodante Marcoleta dungan ang pag-ingon nga kadto hinoong tataw nga nalambigit sa anomaliya sa flood control projects wala hinoon makasohi.  Ang selective justice o pinili nga hustisya mao ang pagpatuman sa balaod ngadto sa mga kaaway samtang gipanalipdan ang mga kaanib. Alang sa mga anaa sa gahum, ang krimen mabuhat lang sa uban apan exempted sila. Alang kanila, “Adunay duha ka matang sa balaod: kadtong angay pagasundon, ug kadtong gihimo alang sa ilang kasayon.”  Fezteleern!

Under “negotiation”

Namahayag si Cebu City Vice Mayor Tomas Osmeña nga ang kapin sa dekada na nga gi-reconstruct nga Cebu City Medical Center (CCMC) mao ang labing corrupt nga infrastructure project sa dakbayan.  Miawhag usab ang konseho nga paimbestigahan sa mayor ang kalangan sa trabaho sa CCMC.  Gipadayag na gayud ni Osmeña ang dugay na nga namatikdan sa katawhan: ang kalangay sa pagtiwas sa CCMC.  Kon tinuod ang pasangil sa bise mayor, maingon nato nga “Basta maghisgot og CCMC, ang mga pulong nga “under construction” nagpasabot lang diay nga “under negotiation” pa.”  Saoonz!

Magsumpaki ang pamahayag

Gisalindot ni Cebu City Mayor Nestor Archival ang mga pasangil nga ang nagpadayon nga redevelopment sa Carbon Market usa ka paagi sa pag-privatize sa maong merkado, dungan ang pagpasalig nga ma-accommodate gayod ang tanang mga vendors nga apektado sa modernisasyon.  Lisod toohan, labi na sa mga yanong manindahay, ang pamahayag sa mayor luyo sa kamatooran nga adunay joint venture agreement ang syudad tali sa usa ka private developer. Matud pa ni Lolo, “Dili maayo kon magkasumpaki ang imong mga pamahayag, kay basin moabot ang panahon nga dili mo na masayran kon asa ang tinuod sa imong gipamahayag.”  Muleeng!

Prank calls

Naaprobahan na sa konseho sa Mandaue City sa first reading ang ordinansa nga nagtratar isip usa ka serious offense sa mga prank calls ug false alarms nga gitumong sa mga emergency response units.  Buot sa konseho nga masumpo ang mga binuang nga tawag nga maka-uwat usahay sa mga emergency responders.  Apan makapangutana kita, kay prank call man, unsaon nimo pa-ila ug pagsilot sa prank caller? Morag haum ang panahom nga, “Ang walay hinungdan nga balaodnon, maoy timaan nga adunay mihatag og naghinangapin nga pagtagad sa usa ka mariyot lamang kaayo nga kahasol.”  Pagkatoytoy!