"Nakapaldo ang buaya"

Kini ang paghulagway ni Raquel Arce sa iyang sakop nga nasakpan nga nangilkil sa mga motorista nga iyang gibadlong tungod sa mga traffic violation ug nasuta nga usa ra ka enforcer ang nihimo sa pagpamaldo bisan asa siya madestino matud ni Arce. Pastilan paldongpaldo gyud diay kay sa kantidad nga P100 lang pwede na niyang palutson ang mga violators kay sa iyang pagpamaba nga mas hasol na kong didto na maabot pa sa buhatan sa CCTO nga modako na ang mabayran. Kaduha pa siya nasakpan kay nakuhaan man og video apan kadtong wala navideohan walay labot sa kwenta.

Matud ni Arce nga naghatag og dakong kauwawan ug mantsa sa ilang buhatan ang ingon niini nga binuhatan tungod kay sama sa lata nga kamatis maangin ang mga maayong kamatis sa pagkadaut busa gipotbol dayon niya ang buaya nga enforcer ug iyang girekomendar nga dili na ma-renew kay job order man ang estado niini. Mas maayo nga tangtangon dayon ang lata nga kamatis aron dili na matakdan pa ang uban nga nagtinarong intawon sa ilang trabaho nga nag antos sa init ug uwan basta maserbisyo lang sa katawhan.

Bagaa gyud og nawong ang ingon niining tawhana nga walay utok kong naa man toa gibutang sa iyang kunot, gibaylo ang dili lang ang iyang sweldo kon dili sa tibuok niyang pagkatawo sa usa ka gatos ka pesos nga nakuha niya sa iyang pagpangilkil. Walay molungtad nga dautang binuhatan ilabi na karon nga tanang tawo mga cctv camera na ang mata ug literal nga naa gyud mga camera nga recorded na ang tanan nga lihok.

Makapadismaya usab kay ang mga tawo ra man usab ang magkonsenti sa ingon niini nga dautang binuhatan kay base lang sa komento sa social media. Mas gibasol pa man nila ang mga traffic violators nga mao nay gihatagan og pabor sa enforcer kay nagpakabana kuno unya ang mga biktima na hinoon ang dautan, pastilan utoka labaw pa ka lata sa utok sa buayang enforcer.

Kong magpabilin ang ingon niini nga mindset sa mga tawo mas modaghan pa ang mga buaya sa karsada nga mamiktima sa mga tawo. Hinuon alang sa mga traffic violators deserve lang gyud pangdakpon ug pamultahon kay mga gahi man og ulo, palaban dayon sa video. Maayo ra gyud ipagpakog ang mga violators nga mobayad ug ang kurakot nga enforcers.

Hinaut usa lang kining buaya diha kay basin daghan ni sila og wala lang nakuhaan og video, bitaw kong dunay mga latang kamatis duna usay maayo ug ligdong nga naghimo sa trabaho nga angayan usab natong daygon. Kadtong mga nagtinarong pangsipaa na ang inyong mga kauban nga naghugaw hugaw sa inyong ngalan.