EDITORYAL - Kinahanglang mopadayun

Walay hunong ang pag-abot sa mga hinabang para sa mga pamilyang nabiktima sa 6.9 magnitude nga linog didto sa amihanang Sugbu. Gani gikan sa tent city naa na karoy gipaspasan nga gitukod nga Bayanihang Village nga gitukoran og mas lig-on nga mapuy-an sa mga apektadong pamilya.

Sila kadtong mga pamilyang ang mga balay nagusbat gyud sa linog ug ang uban kadtong naa duol sa mga fault ug sinkholes nga gideklarar sa mga otoridad nga dili luwas na puy-an para nila ilabi na nga padayun pa gihapon ang mga aftershocks.

Niadtong nakalabay nga adlaw, nibalik si Presidente Ferdinandn Marcos Jr. sa lugar aron susihon ang kalamboan sa paningkamot sa gobiyerno nga matabangan ang mga apektado ug wala siya magmahay tungod kay halos tanan sa ilang gipangayo ang nahatag sa gobiyerno ug padayun pa ang pagpalambo ani.

Apan samtang tuod gikinahanglan nga tabangan dayun ang mga naapektahan, angay sab tan-awon sa ubang ahensiya sa gobiyerno ang mga butang nga kinahanglan sab og pagtagad sama sa mga publikong imprastraktura sama sa mga nangaguba nga taytayan, mga pantalan, terminals, mga eskuylahan, linya sa tubig, linya kuryente, kamerkodohan,  mga pantalanan, klinika, tambalanan ug uban  pa.

Kay kaning maong mga imprastraktura makatabang sa paspas nga pagbangon sa katilingban nga padayun nalisang sa mga aftershocks. Pinaagi ani, hinayhinay nga ma-busy og balik ilang hunahuna sa naandan sama sa ilang panginabuhian.

Dili pwedeng anha lang tanan sa evacuation centers nakatutok ang tanang paningkamot sa gobiyerno tungod kay kinahanglang moabante ug mopadayun ang tawo sa pagpakabuhi sa kaugalingong mga tiil.

Sa laktod, maayong tabangan sab sa katawhan ang gobiyerno aron makapangandam sab kini ug ang tanan sa posibleng lain pa unyang mga katalagman.