EDITORYAL - Makasohan kaha tanan?

Gipahibalo sa  Office of the Ombudsman nga naa sila karoy giimbestigar nga 200 ka mga kaso nga may kalambigitan sa anomalosong flood control projects sa gobiyerno.

Matud pang Ombudsman Jesus Crispin Remulla sa atubangan sa 2026 Southeast Asian Ombudsman Forum nga sa 209 ka aktibong imbestigasyon nga ilang gisusi karon, upat ana ang naa na sa korte.

Kaning imbestigasyon importante kaayo ni para sa kaayohan sa nasud. Kinahanglang manubag ang mga sad-an bisan kinsa pa sila, ma senador man , kongresista ug bisan pa bise presidente o ang presidente  sa nasud.

Kay kwarta kini sa katawhan ug para ra gyud dapat sa kaayohan sa katawhan ug sa nasud ug dili para sa pipila lang ka bulsa sa mga opisyales sa gobiyerno nga mga hangol ug hakog sa kwarta.

Samtang nindot kaayo hunahunaon nga kapin 200 ka kaso ang giimbestigar karon sa Ombudsman, upat palang ang aktwal nga nasang-at sa korte.

Dapat papaspasan ni Presidente Ferdinand Marcos Jr. ang pagpaimbestigar ani.

Ang mga napasakaan na og kaso tungod sa kalambigitan sa anomaly naglakip sa mga kanhi magbabalaod nga silang Zaldy Co ug kanhi senador Bong Revilla ug si Sen. Jinggoy Estrada.

Apil sad sa nakasohan na sa korte mao ang magtiayong Curlee ug Sara Discaya, ang mga gihulagway nga pinalabing kontraktor nga maoy kanunay makakuha sa mga kontrata sa mga proyektong tukoron sa gobiyerno.

Ang pangutana karon, makasohan ba kaha ni ang tanang nalambigit sa kurapsyon sa flood control sa dili pa magsugod ang election period  para sa tuig 2028?

Pagkatinuod, kinahanglan nga karong tuiga, 2026, mapasakaan na og kaso bisan og ang katunga lang aning 200 ka mga giimbestigahan. Maayo nga unahon ang mga elected officials nga gipangdudahan mintras layo pa ang election period.

Basta dili lang gamiton ang maong mga kaso aron paglutos sa mga karibal sa politika para dili madudahan nga naay motibo ang imbestigasyon ug ibase ang tanan sa ebidensiya.

Pero mas malipay ang katawhan kung tanang giimbestigar mapasakaan og kaso kung dunay kapasikaran nga sila kasohan.