Ang bitin sa katilingban

Kining nahitabo sa 50-anyos nga amahan nga gipusposan og dos por dos nga kahoy a iyang 24-anyos nga anak sa Barangay Kinasang-an sa dakbayan sa Sugbo ug ang nahitabo nga pagpanglabni og kwentas sa usa ka tiguwang babaye sa lungsod sa Tabogon diin ang naghimo duha ka lalaking riding and tandem ang nagsalamin kon unsa ka salbahis ang mga tawo nga dili man moila og kadugo ug dili moila og edad basta matuman lang ang ilang dautan nga tinguha.

Unsa man ang posibleng hinungdan niini? Walay lain kon dili ang illegal nga drugas nga maoy nag gawong karon sa utok niining mga kriminal nga naa sa atong palibot.

Ang kaso niining mag amahan sa dakbayan sa Sugbo, nasuko ang anak nga gamay ang kan-on nga iyang nadawat ug wala pa gyuy sud-an maong tungod sa iyang kasuko nikuha siya og kahoy og dayon bunal sa iyang amahan nga napangayo og tabang maong naluwas kay kong wala pa aw perting pataya.

Ikaduha na diay kini nga higayon nga gibuhat sa anak ngadto sa iyang amahan. Ang una iyang gidunggab og screw driver ang tangkogo sa iyang amahan niadtong nakalabay’ng tuig hinungdan nga nalandig siya sa Cebu City Jail apan nakagawas man kay lagi gihatagan og laing higayon sa iyang amahan.

Apan gitraydor naman pud siya ug karon gi-dos por dos na usab siya ug kong iya pa kining pasayloon aw sa ikatulong higayon seguradong mapatay na gyud siya.

Giangkon sa anak nga tiggamitan siya og illegal nga drugas busa wala siya sa iyang paminsar dihang iyang gihimo ang salaod.

Pagkasalbahin anaka, maayong wagtangan og hangin sa iyang baga aron dili na makamugna og kadaut sa iyang pamilya ug sa tawo nga naghatag kaniya sa iyang kinabuhi.

Bitaw isip usa ka amahan mobati man gyud kita og kaluoy sa atong anak ug andam kita nga mobuhis sa atong kinabuhi tungod ug alang sa mga bata.

Apan kong hilabihan ka bitin nga walay atay ug kasing kasing, ambot nalang unsay atong mabuhat.

Kong kutloan pud nato sa kinabuhi wala pud kitay kalainan sa kadautan, mas maayo nga pasagdan nalang siya mag atubang sa resulta sa krimen nga iyang nahimo.

Sa tinuod lang, unsa man gyud ang tinuod nga kahimtang karon sa atong palibot nga dili naman kita kakompiyansa sa mga tawo nga atong ikasugat ug ikaestorya kay bisan gani ang tawo nga igputol nato sa tinae unayon pa man ta.

Nahitabo kini tungod sa pagkagumon na sa hunahuna sa uban sa illegal drugs. Unta dili kini angayan nga ipakagamay lang kay makapaalarma na kini. Samtang hilabihan ang kainit ang kasikas sa politika pero hilom kaayo ang paglihok karon sa illegal nga drugs nga inanay nga mikaon sa utok sa iyang mabiktima.