Tsismoso

Namasangil si Mayor Nestor Archival kang kanhi Mayor Raymond Alvin Garcia nga namalit kini og tag P20,000 nga T-shirt, sakyanan sa mayor nga mobalor og P4.4 milyones, nagpatrabaho og mga kalag sa City Hall ug nagbilin og P2bilyones nga utang.

Samtang gipangita usab ni Bise Mayor Tomas Osmeña ang P12 bilyones nga salapi sa siyudad nga iyang giingon ngs nawagtang.

Gani ang bise mayor nagpatabang na ni kanhi chairman sa Commission on Audit nga si Heidi Mendoza.

Gitubag ug gipanghimakak ni Garcia ang pasangil sa duha ka bag-ong tag-as nga opisyal sa dakbayan sa Sugbo. Tubag niya, walay dokumento nga magpamatuod sa pasangil sa duha ngadto kaniya.

Gipresentar ni Garcia ang mga dokumento nga ang t-shirt nga giingong tag P20,000 ang matag usa nagkantidad lamang og P500 ug P400.

Walay ikapakita si Archival ug Osmeña nga magpamatuod sa mga kalag nga kawani.

Ang mahalon nga sakyanan wala dayona sa pagpalit kay mahal ra samtang walay findings sa COA nga nag ingon nga naalkanse ang siyudad sa Sugbo.

Nangayo og pasaylo si Mayor Archival ngadto sa kanhi Garcia. Iyang giingon nga ang iyang nasulti basi lamang sa raw nga kasayoran nga gipasa ngadto kaniya.

Akong unsolicited nga tambag sa mayor, ayaw pagpasagad og buka sa imong baba kun dili ka pa segurado.

Ayaw pagtuo dayon sa mga istorya kun waka kini dokumento kay mahulog ka niana nga tsismoso. Ngil-ad nga paminawon nga ang mayor sa Queen City of the South tawgon nga tsismoso.

Gawas nga matawag ka nga tsismoso, nagsabwag ug nagpalapad pa g’yud ka sa dili tinuod nga balita o fake news kay kutob sa mogawas sa imong baba himoan man kini og balita.